انٹرنیشنل کرکٹ کونسل(آئی سی سی) نے مینز اور ویمنز کرکٹ میں سال کے بہترین ٹی20 کھلاڑیوں کی نامزدگیوں کا اعلان کردیا ہے،پاکستان کے محمد رضوان اور ندا ڈار اس فہرست میں جگہ بنانے میں کامیاب رہے ہیں۔
مینز کرکٹ میں رضوان کے ساتھ ساتھ بھارت کے سوریا کمار یادیو، انگلینڈ کے سیم کرن اور زمبابوے کے سکندر رضا بھی ایوارڈ کی دوڑ میں شامل ہیں۔
یاد رہے کہ محمد رضوان 2021 میں سال کے بہترین ٹی20 کرکٹر کا ایوارڈ جیتنے میں کامیاب رہے تھے۔
سال 2022 میں سب سے زیادہ رنز بنانے والوں میں سوریا کمار یادیو سرفہرست ہیں جنہوں نے ایک ہزار 164 رنز بنائے جبکہ رضوان نے 996، ویرات کوہلی نے 781 اور سکندر رضا نے 735 رنز اسکور کیے۔
دوسری جانب ویمنز کرکٹ میں بھی سال کے بہترین کھلاڑی کے ناموں کا اعلان کردیا گیا ہے۔
پاکستان کی ندا ڈار کو ایوارڈ کے لیے نامزد کیا گیا ہے جبکہ ان کا بھارت کی سمرتی مندھانا، نیوزی لینڈ کی صوفی ڈیوائن اور آسٹریلیا کی تہلا میک گرا سے مقابلہ ہے۔
پاکستان کی ندا ڈار نے 2022 میں بہترین کھیل پیش کرتے ہوئے 56.67 کی اوسط سے 16 میچوں میں 396 رنز بنائے جبکہ 15 وکٹیں بھی حاصل کیں۔
