خیبرپختونخوا کے وزیراعلیٰ علی امین گنڈا پور نے کہا ہے کہ خیبرپختونخوا میں آپریشن نہیں ہونے دیں گے۔
بنوں میں امن جرگہ سے خطاب کرتے ہوئے علی امین گنڈاپور کا کہنا تھاکہ امن اور انصاف مانگیں گے نہیں، امن اور انصاف لیں گے، ہم نے پاکستان کے لیے اپنا خون بھی بہایا ، تن من دھن کی قربانی بھی دی ، تاریخ گواہ ہے ہمیں بہت قربانیاں دینی پڑیں۔
انہوں نے کہا کہ غلط پالیسیوں کی وجہ سے کے پی کے لوگوں نے بہت نقصان اٹھایا۔ بے وقوف انسان وہ ہے جو اپنے تجربے سے نہیں سیکھتا۔
علی امین گنڈاپور نے اعلان کیا کہ خیبرپختونخوا میں آپریشن نہیں ہونے دیں گے، ہمارے فیصلے کوئی اور نہیں کرے گا ہم خود کریں گے، سب سن لیں! امن مانگیں گے نہیں امن لیں گے، حلف دیتا ہوں حق، امن اور انصاف کے لیے عوام کے ساتھ کھڑا ہوں گا، خیبرپختونخوا کی سرزمین پرکوئی ہم پر ظلم وجبر نہیں کرسکتا۔
ان کا کہنا تھاکہ غلط پالیسیوں کی وجہ سے کے پی کے لوگوں نے نقصان اٹھایا، ہمارے نام پر ڈالر لیے گئے ہم اس پر بھی تحفظات ہیں،امریکہ کے غلاموں نے پختونوں پر غلط پالیسیاں تھوپیں۔ قربانی دینا ہمارے خون میں ہے پھر بھی اس ملک کے لیے قربانی دیں گے، ایسے عناصر موجود ہیں جو ہماری بات کو توڑ مروڑ کر پیش کرتے ہیں۔
وزیراعلیٰ نے کہا کہ پہلے بھی کہا تھا کہ اپنی اصلاح کرلو جو اصلاح نہیں کرے گا سزا کے لیے تیار رہے جہاں شرپسندوں کا شبہ ہوگا وہاں پولیس کارروائی کرے گی، کوئی مسلح گروہ یا مسلح شخص مجھے خیبرپختونخوا میں نظر نہ آئے، کوئی کسی پر ناجائز ہاتھ ڈالنے سے پہلے سوچ لے کہ یہ ہاتھ مجھ پر ڈالا جائے گا۔
انہوں نے کہا کہ پولیس کو اختیار دیتا ہوں منشیات فروشوں کو مت چھوڑیں میں آپ کے ساتھ ہوں، ہمارا شخصیت سے تو اختلاف ہوسکتا ہے لیکن شہدا سے متعلق غلط بات پر مجھے تکلیف ہوتی ہے۔
دینی مدارس کا ذکر کرتے ہوئےعلی امین گنڈاپور کا کہنا تھا کہ کے پی کے عوام سن لیں مدرسے کے بچے ہمارے دلوں کے بہت قریب ہیں، بجٹ میں مدرسے کے طلبہ کے لیے بھی فنڈز رکھے ہیں، مدرسے کے طلبہ کو بنیادی تعلیم اور روزگار میں بھی حق دیں گے۔
