افغانستان ،طالبان نے خواتین کے این جی او ز میں کام کرنے پر پابندی عائد کردی

افغانستان میں طالبان حکومت نے خواتین کے فلاحی تنظیموں(این جی اوز) میں کام کرنے پر پابندی لگادی۔

ا فغان وزارت معاشی امور کی جانب سے جاری نوٹیفکیشن میں تمام مقامی اور غیرملکی تنظیموں کو خواتین ملازمین کو کام پرنہ بلانے کی ہدایت کی گئی ہے۔ نوٹیفکیشن میں کہا گیا ہے کہ حکم کی خلاف ورزی پر این جی اوز کے لائسنس معطل کر دیے جائیں گے۔

وزارت معاشی امور کے ترجمان عبدالرحمان حبیب کا کہنا ہے کہ خواتین ملازمین کو تا حکم ثانی کام کرنے کی اجازت نہیں دی جائے گی کیونکہ کچھ خواتین ملازمین نے اسلامی لباس کی انتظامیہ کی تشریح پر عمل نہیں کیا۔

واضح رہے کہ گزشتہ دنوں افغانستان میں طالبان نے خواتین کی اعلیٰ تعلیم پر پابندی لگا دی تھی ،طالبان کے اس فیصلے پرمسلم ممالک سمیت دنیا بھر سے سخت تنقید کی جارہی ہے۔