چیئرمین تحریک انصاف عمران خان نے جیل بھرو تحریک معطل کرنے کا اعلان کردیا ہے۔
ٹویٹر پر جاری بیان میں سابق وزیراعظم عمران خان کا کہنا تھا کہ ہم جیل بھرو تحریک معطل کر کے پنجاب اور خیبر پختونخوا میں انتخابی مہم چلانے کے لئے آگے بڑھیں گے۔
ہم عدالتِ عظمیٰ کےفیصلےکا خیرمقدم کرتےہیں۔آئین کا تحفظ SC کا فرض تھا اور معززججز نےآج اپنےفیصلےکےذریعےیہ فرض نہایت بہادری سےنبھایاہے۔یہ پاکستان میں قانون کی حکمرانی پر تصدیق کی ایک مہر ہے۔ہم اپنی جیل بھروتحریک معطل کررہےہیں اور KP اور پنجاب میں انتخابی مہم کیجانب بڑھ رہےہیں۔
— Imran Khan (@ImranKhanPTI) March 1, 2023
عمران خان نے اپنے ٹویٹ میں اس امید کا اظہار کیا کہ آئین کا تحفظ سپریم کورٹ کی ذمہ داری ہے اور سپریم کورٹ نے آج کے فیصلے سے اپنی ذمہ داری کو پورا کیا ہے۔
واضح رہے کہ عمران خان نے ملک میں مبینہ لاقانونیت، آئین شکنی اور روز افزوں مہنگائی کے خلاف 22 فروری سے پر امن جیل بھرو تحریک کے پہلے مرحلے کا آغاز کیا تھا۔
جیل بھرو تحریک کا پہلا مرحلہ آٹھ روز پر مشتمل تھا۔پہلے مرحلے میں لاہور، پشاور، راولپنڈی،ملتان، گوجرانوالہ، سرگودھا،ساہیوال اور فیصل آباد میں جیل بھرو تحریک کے تحت گرفتاریاں دینے کا اعلان کیا گیا تھا۔
جیل بھرو تحریک پہلے مرحلے کے آٹھویں روز آج فیصل آباد میں تحریک انصاف کے کارکنوں نے گرفتاریاں دینے کا اعلان کر رکھا تھا لیکن پنجاب اور خیبرپختونخوا میں انتخابات سے متعلق سپریم کورٹ کے ازخود نوٹس کیس کا فیصلہ آنے کے بعد چیئرمین تحریک انصاف نے فیصلے کو خوش آئند قرار دیتے ہوئے جیل بھرو تحریک معطل کرنے کا اعلان کیا اور کہا کہ اب وہ پنجاب اور خیبر پختونخوا میں انتخابی مہم چلانے کے لئے آگے بڑھیں گے۔
سپریم کورٹ کا پنجاب اورخیبرپختونخوا میں 90 روز میں الیکشن کرانے کا حکم
سپریم کورٹ آف پاکستان نے پنجاب او ر خیبرپختونخوا میں انتخابات کے از خود نوٹس کیس کا گزشتہ روز محفوظ کیا گیا فیصلہ سناتے ہوئے قرار دیا ہے کہ دونوں صوبوں کی اسمبلیوں کی تحلیل کے نوے دن کے اندر انتخابات کا انعقاد یقینی بنایا جائے۔
