جنوبی وزیرستان اپر کی تحصیل مکین کے علاقے زیڑسار میں نامعلوم مسلح افراد کی اندھا دھند فائرنگ سے امن کمیٹی کے دو رضاکار جاں بحق ہو گئے۔
مقامی ذرائع کے مطابق یہ افسوسناک واقعہ نمازِ عشاء کے بعد اس وقت پیش آیا جب سجاد عرف چنار اور رضوان عرف سنگرمل، جو کہ مکین زیڑسار کے رہائشی تھے، ایک مقامی دکان میں موجود تھے۔
جیسے ہی دونوں افراد دکان سے باہر نکلے پہلے سے گھات لگائے مسلح حملہ آوروں نے ان پر گولیوں کی بوچھاڑ کر دی جس کے نتیجے میں دونوں رضاکار شدید زخمی ہو کر دم توڑ گئے۔
اطلاع ملتے ہی پولیس اور قانون نافذ کرنے والے اداروں کی بھاری نفری جائے وقوعہ پر پہنچ گئی جس نے علاقے کو گھیرے میں لے کر سرچ آپریشن شروع کر دیا ہے۔
