جنوبی وزیرستان لوئر کی تحصیل برمل کے علاقے اعظم ورسک میں خود کش دھماکے کے نتیجے میں کم از کم 14 مقامی افراد زخمی ہو گئے ہیں۔
مقامی ذرائع کے مطابق یہ دھماکہ ایک سیکورٹی چیک پوسٹ کے قریب ہوا جس کی زد میں آکر ایک پیٹرول پمپ اور دینی مدرسے کی عمارت کو بھی نقصان پہنچا ہے۔
دوسری جانب سیکورٹی حکام نے اپنے بیان میں کہا ہے کہ فوج نے دہشت گردوں کا ایک خودکش حملہ ناکام بناتے ہوئے بارود سے بھری گاڑی کو ہدف تک پہنچنے سے پہلے ہی تباہ کر دیا ہے۔
بیان میں مزید کہا گیا ہے کہ خودکش حملہ آور مارا گیا ہے اور علاقے میں سرچ آپریشن جاری ہے۔
پیٹرول پمپ کے مالک تاج محمد وزیر کا کہنا ہے کہ زخمیوں میں ان کے دو بھائی اور پمپ کے دو ملازمین بھی شامل ہیں۔
ہیڈ کوارٹر ہسپتال وانا کے حکام نے14 زخمیوں کی تصدیق کرتے ہوئے خدشہ ظاہر کیا ہے کہ زخمیوں کی تعداد میں مزید اضافہ ہو سکتا ہے۔
