پاکستان اور افغانستان نے فوری جنگ بندی پر اتفاق کر لیا ہے جس کی تصدیق قطری وزارت خارجہ نے کر دی ہے۔
یہ اہم پیشرفت دوحہ میں ہونے والے مذاکرات کے دوران سامنے آئی جو قطر اور ترکی کی مشترکہ ثالثی سے ممکن ہوئی۔
قطری وزارت خارجہ کے ترجمان کے مطابق دونوں ممالک نے نہ صرف جنگ بندی پر اتفاق کیا بلکہ آنے والے دنوں میں مزید ملاقاتیں کرنے اور مستقل امن و استحکام کے لیے مؤثر مکینزم تشکیل دینے پر بھی رضا مندی ظاہر کی ہے۔
وزارت خارجہ نے امید ظاہر کی ہے کہ یہ جنگ بندی خطے میں پائیدار امن کے قیام میں سنگ میل ثابت ہوگی اور دونوں ہمسایہ ممالک کے درمیان سرحدی کشیدگی کے خاتمے میں مددگار بنے گی۔
مذاکرات کا پہلا دور دوحہ میں قطری انٹیلی جنس چیف عبداللّٰہ بن محمد الخلیفہ کی میزبانی میں ہوا جس میں پاکستان کی نمائندگی وزیر دفاع خواجہ آصف نے کی جبکہ اعلیٰ سیکیورٹی حکام نے ان کی معاونت کی۔
افغان وفد کی قیادت امارتِ اسلامیہ افغانستان کے وزیر دفاع ملا محمد یعقوب نے کی جن کے ہمراہ افغان انٹیلی جنس چیف عبدالحق وثیق بھی شامل تھے۔
