پاکستان پر قرضوں کا بوجھ خطرناک حد تک بڑھ چکا ہے، ہر شہری اس وقت اوسطاً 3 لاکھ 18 ہزار 252 روپے کا مقروض ہے۔
اکنامک پالیسی اینڈ بزنس ڈویلپمنٹ کی تازہ رپورٹ میں بتایا گیا ہے کہ 10 سال قبل ہر شہری کا قرضہ 90 ہزار 47 روپے تھا جو اب تین گنا بڑھ گیا ہے۔ قرضوں میں سالانہ اوسط 13 فیصد اضافہ ہو رہا ہے اور ہر 6 سال میں یہ بوجھ دوگنا ہو جاتا ہے۔
رپورٹ میں حکومت کو فوری مالی نظم و ضبط اپنانے، ٹیکس نیٹ کو وسیع کرنے اور پالیسی ریٹ کو موجودہ 11 فیصد سے کم کر کے 9 فیصد کرنے کی ہدایت کی گئی ہے۔ پالیسی ریٹ میں کمی سے قرضوں پر سود کی لاگت میں 12 کھرب روپے کی کمی متوقع ہے۔
مزید بتایا گیا ہے کہ پالیسی ریٹ میں کمی سے مالی گنجائش بڑھے گی، کاروبار زیادہ مسابقتی ہوں گےجبکہ قرضوں کی صورتحال خطے کے دیگر ممالک کے مقابلے میں کہیں زیادہ خراب ہے۔ پاکستان کا قرضہ ملکی معیشت کے 70.2 فیصد کے برابر پہنچ چکا ہے۔
