ضلع باجوڑ کی تحصیل خار کے علاقے شیخ کلے میں دریا میں صنعتی فضلہ پھینکنے پر 13 ماربل فیکٹریوں کے خلاف کارروائی کرتے ہوئے انہیں سیل کر دیا گیا ہے۔
یہ اقدام وزیراعلیٰ خیبرپختونخوا محمد سہیل آفریدی کی کھلی کچہری کے ایجنڈے اور مقامی آبادی کی شکایات کی روشنی میں اٹھایا گیا۔
ضلعی انتظامیہ کے مطابق ڈپٹی کمشنر باجوڑ کی ہدایات پر اسسٹنٹ کمشنر ہیڈکوارٹر خار کی نگرانی میں تحصیلدار خار حبیب الرحمٰن نے متعلقہ فیکٹریوں کا اچانک معائنہ کیا۔
یہ بھی پڑھیں :محکمہ اعلیٰ تعلیم خیبرپختونخوا نے نگران دور میں بھرتیوں کے خلاف کارروائی شروع کر دی
دورانِ معائنہ یہ بات سامنے آئی کہ فیکٹریاں ماربل کا فضلہ بلا روک ٹوک دریا میں خارج کر رہی تھیں، جس سے پانی آلودہ ہو رہا تھا اور انسانی صحت کو شدید خطرات لاحق تھے۔
انتظامیہ نے ماحولیاتی قوانین کی خلاف ورزی ثابت ہونے پر موقع پر ہی 13 ماربل فیکٹریوں کو قانون کے مطابق سیل کر دیا۔
اس کے ساتھ ساتھ فیکٹری مالکان کو اسسٹنٹ کمشنر ہیڈکوارٹر خار کے دفتر طلب کر کے ان کے خلاف مزید قانونی کارروائی کا آغاز بھی کر دیا گیا ہے۔
ضلعی انتظامیہ نے واضح کیا ہے کہ ماحولیاتی قوانین کی پامالی کسی صورت برداشت نہیں کی جائے گی اور عوامی صحت کے تحفظ کے لیے ایسے اقدامات آئندہ بھی بلا امتیاز جاری رہیں گے۔
