گل زمان وزیر
وانا ویلفیئر ایسوسی ایشن (واوا) کے زیر اہتمام ضلع جنوبی وزیرستان لوئر کے مختلف علاقوں میں “ہر بچے کو اسکول میں داخل کرو” کے نعرے کے تحت داخلہ مہم کا انعقاد کیا گیا ۔
مہم میں والدین، اساتذہ، علما کرام، قومی مشران، سماجی کارکنوں اور بچوں کی بڑی تعداد نے شرکت کی۔
اس سلسلے میں وانا، برمل، شکئی، سپین، تنائی اور دیگر علاقوں میں نکالی گئی۔ ریلیوں، آگاہی واکس اور تقریبات میں شرکاء نے تعلیم کی اہمیت پر زور دیا۔
مہم کی سب سے بڑی ریلی رستم بازار سے نکالی گئی جو گورنمنٹ ہائی اسکول وانا پر اختتام پذیر ہوئی۔ ریلی میں شریک افراد نے “ہر بچہ، ہر بچی، اسکول میں” جیسے نعرے بلند کئے۔
وانا ویلفیئر ایسوسی ایشن کے صدر، رحمت اللہ وزیر نے اپنے خطاب میں کہا کہ تعلیم ہر بچے کا بنیادی حق ہے اور واوا ہر سال یہ مہم جاری رکھتی ہے تاکہ قبائلی اضلاع میں تعلیمی بیداری بڑھائی جا سکے۔
ڈپٹی کمشنر جنوبی وزیرستان لوئر، ناصر خان نےبھی ریلی میں شرکت کی اور واوا کی کوششوں کو سراہا، ساتھ ہی ضلعی انتظامیہ کی جانب سے تعلیم کے فروغ کے لیے مکمل تعاون کا یقین دلایا۔
