جنوبی وزیرستان کے معروف صحافی اور سوشل ایکٹیویسٹ اتش محسود پر نامعلوم افراد کی جانب سےفائرنگ کی گئی تاہم وہ خوش قسمتی سے محفوظ رہے۔
واقعہ گزشتہ رات اس وقت پیش آیا جب وہ وانا سے واپسی پر تحصیل تیارزہ میں اپنے گھر کے قریب پہنچ گئے۔
اتش محسود کے مطابق حملہ آور پہلے سے تاک میں بیٹھے تھے، اور جیسے ہی وہ گھر کے قریب پہنچے، حملہ آوروں نے اندھا دھند فائرنگ شروع کر دی۔ انہوں نے مزید بتایا کہ فائرنگ کے بعد حملہ آور موقع سے فرار ہو گئے۔
واقعے کے بعد مقامی صحافی برادری میں شدید تشویش کی لہر دوڑ گئی ہے، اور صحافیوں نے اس واقعے کی سخت مذمت کرتے ہوئے حملہ آوروں کی فوری گرفتاری کا مطالبہ کیا ہے۔ ان کا کہنا ہے کہ اتش محسود جیسے باہمت آوازوں کو خاموش کرنے کی کوششیں آزادی اظہارِ رائے پر حملہ ہیں۔
اتش محسود جنوبی وزیرستان میں انسانی حقوق، سماجی مسائل اور شفاف اطلاعات کی فراہمی کے لیے متحرک ہیں، اور نوجوانوں میں ان کی آواز کو خاصی پذیرائی حاصل ہے۔
واقعے کی ایف آئی آر تھانہ تیارزہ میں درج کر لی گئی ہے جبکہ پولیس نے تفتیش کا آغاز کر دیا ہے۔
