خیبر پختونخوا کے ضلع سوات میں حالیہ سیلابی ریلوں کے نتیجے میں پیش آنے والے افسوسناک سانحے پر صوبائی حکومت نے فوری کارروائی کرتے ہوئے متعدد اعلیٰ افسران کو ان کی مبینہ غفلت اور ناقص کارکردگی پر معطل کر دیا ہے۔
وزیراعلیٰ خیبر پختونخوا کی ہدایت پر کی گئی اس کارروائی کی تفصیلات ترجمان وزیراعلیٰ فراز احمد مغل نے میڈیا سے شیئر کرتے ہوئے بتایا کہ وزیراعلیٰ انسپکشن ٹیم کو باقاعدہ انکوائری کی ہدایات جاری کر دی گئی ہیں، تاکہ واقعے کی مکمل تحقیقات کی جا سکیں۔
ترجمان کے مطابق، ابتدائی طور پر اسسٹنٹ کمشنر بابوزئی کو متاثرہ علاقے میں سست ردعمل دکھانے پر معطل کیا گیا ہے، جب کہ اسسٹنٹ کمشنر خوازہ خیلہ کو بروقت پیشگی وارننگ جاری نہ کرنے پر ان کے عہدے سے ہٹا دیا گیا ہے۔
اسی طرح ایڈیشنل ڈپٹی کمشنر (ریلیف) کو پیشگی انتظامات میں ناکامی پر معطل کر دیا گیا ہے۔ اس کے علاوہ، ریسکیو سرگرمیوں میں سستی اور نااہلی پر ریسکیو 1122 سوات کے ضلعی انچارج کو بھی فوری طور پر معطل کرنے کا فیصلہ کیا گیا ہے۔
خیال رہے کہ سوات میں حالیہ سیلابی ریلوں کے باعث 18 افراد جاں بحق ہوئے، جن میں سے 8 کی لاشیں برآمد ہو چکی ہیںجبکہ 10 افراد تاحال لاپتہ ہیں۔
