شمالی وزیرستان میں فوجی قافلے پر خودکش حملے میں پولیس اہلکار سمیت 5 اہلکار زخمی ہوگئے۔
ایک سینئر پولیس اہلکار نے نام نہ ظاہر کرنےکی شرط پر میڈیا کو بتایا کہ یہ حملہ 19 دسمبر کو میرانشاہ رزمک روڈ پر ٹل پل کے قریب ہوا۔
انہوں نے مذید بتایا کہ خودکش حملہ آور موٹر سائیکل پر سوار تھے اور انہوں نے قافلے کے قریب دھماکا کیا جس میں چار فوجی اور ایک پولیس اہلکار زخمی ہوا۔
واضح رہے کہ14 دسمبر کو میرامشا میں فوجی قافلے پر خودکش حملے میں ایک فوجی اور ایک شہری ہلاک اور چار فوجیوں سمیت 15 افراد زخمی ہوئے تھے۔
حملے کی ذمہ داری کسی نے قبول نہیں کی لیکن حکومتی عہدیداروں کا کہنا ہے کہ تحریک طالبان پاکستان سمیت متعدد مسلح گروپ خیبر پختونخوا میں سرگرم ہیں اور ان کے خلاف کارروائیاں جاری ہیں۔
شمالی وزیرستان میں 19 دسمبر کو ہونے والے حملے کے بعد رواں سال سیکیورٹی فورسز پر خودکش حملوں کی تعداد نو ہو گئی۔
