پشاور کے تھانہ ارمڑ کی حدوود میں ایک بم دھماکہ کے نتیجے میں معروف مذہبی شخصیت اور پشتون قومی جرگہ کے ممبر مفتی منیر شاکر جاں بحق ہوگئے جبکہ 3 ا فراد زخمی ہیں.
لیڈی ریڈنگ ہسپتال(ایل آر ایچ) کے ترجمان محمد عاصم کے مطابق مفتی منیر شاکر کو زخمی حالت میں ہسپتال لایا گیا تھا اور دھماکے میں ان کی ٹانگ شدید متاثر ہوئی تھی۔
ترجمان کے مطابق زیادہ خون بہہ جانے کی وجہ سے ہسپتال میں مفتی منیر شاکر کی موت واقع ہوئی ہے۔
ارمڑ تھانہ کے ایس ایچ او نور محمد کے مطا بق مفتی منیر شاکر عصر کی نماز کے لیے جیسے ہی مسجد میں داخل ہوئے اس وقت پہلے سے نصب شدہ دھماکہ خیز پھٹ گیا، جس کے نتیجے میں مفتی منیر شاکر سمیت چار افراد زخمی ہوئے ۔
دوسری جانب ایس ایس پی پشاور مسعود احمد کے مطابق ابتدائی تفتیش سے ایسا لگتا ہے کہ مفتی منیر شاکر پرحملہ دستی بم سے کیا گیا ہے۔
انھوں نے بتایا کہ مفتی منیر شاکر کی جان کو خطرہ تھا اور انھیں نام نہاد دولتِ اسلامیہ کی شاخ خراسان کی جانب سے دھمکیاں دی جا رہی تھیں۔
واضح رہے کہ مفتی منیر شاکر نے چند روز پہلے اپنی ایک تقریر میں کہا تھا کہ انھیں وٹس ایپ پر دھمکیاں دی جا رہی ہیں.
