پشاور: خیبرپختونخوا اسمبلی نے افغانستان میں زلزلے کے متاثرین کے لیے جذبہ خیرسگالی کے تحت ایک اہم قرارداد منظور کر لی۔
قرارداد میں مطالبہ کیا گیا ہے کہ شدید زخمی افغان شہریوں کو بغیر ویزا پاکستان منتقل کر کے انہیں معیاری علاج معالجے کی سہولیات فراہم کی جائیں۔
قرارداد حکومتی رکن عبیدالرحمان کی جانب سے ایوان میں پیش کی گئی جس میں افغانستان میں زلزلے سے ہونے والے بڑے پیمانے پر جانی و مالی نقصان پر گہرے دکھ اور افسوس کا اظہار کیا گیا۔
قرارداد میں جاں بحق افراد کے لیے دعائے مغفرت اور زخمیوں کی جلد صحتیابی کے لیے دعا کی گئی جبکہ ایوان نے اس بات پر زور دیا کہ پاکستان، بطور ایک برادر اسلامی ہمسایہ ملک، افغان عوام کی مدد کو اپنی انسانی، اسلامی اور اخلاقی ذمہ داری سمجھتا ہے۔
قرارداد میں صوبائی حکومت سے سفارش کی گئی کہ وہ افغانستان کے زخمی متاثرین کو فوری طور پر طبی امدادفراہم کرےاور ان کی پاکستان منتقلی کے عمل میں ویزے کی شرط عارضی طور پر ختم کی جائے تاکہ قیمتی جانیں بچائی جا سکیں۔
قرارداد میں یہ بھی کہا گیا کہ وفاقی اور صوبائی حکومتیں باہمی تعاون سے امدادی ٹیمیں، ادویات اور دیگر طبی سامان فوری طور پر متاثرہ علاقوں میں بھیجیں۔
واضح رہے کہ گزشتہ شب افغانستان میں آنے والے شدید زلزلے نے بڑے پیمانے پر تباہی مچائی اور اب تک 800 سے زائد افراد کے جاں بحق ہونے کی تصدیق ہو چکی ہے۔ کئی دیہات ملبے کا ڈھیر بن چکے ہیں جب کہ طبی سہولیات کی شدید قلت ہے۔
