ڈیرہ اسماعیل خان سے تعلق رکھنے والے پاکستانی مارشل آرٹسٹ عرفان محسود نے ناروے کے سیور دائرسن کا گینیز ورلڈ ریکارڈ توڑ کر ایک اور اعزاز اپنے نام کر لیا۔
ناروے کے سیور دائرسن نے ایک منٹ میں 80 پاؤنڈ وزن کے ساتھ 38 فنگر ٹیپ پش اپس کیے تھے، تاہم عرفان محسود نے یہ کارنامہ 42 پش اپس کے ساتھ انجام دے کر نیا عالمی ریکارڈ قائم کیا۔
عرفان محسود صرف نو سال کے عرصے میں 150 گینیز ورلڈ ریکارڈز بنانے والے پہلے پاکستانی بن گئے ہیں۔ وہ پش اپس کیٹیگری میں 70 سے زائد عالمی ریکارڈز کے ساتھ دنیا بھر میں سب سے آگے ہیں۔
انہوں نے مختلف وزنوں کے ساتھ 100 پاؤنڈ، 80 پاؤنڈ، 60 پاؤنڈ اور 40 پاؤنڈ میں سب سے زیادہ عالمی ریکارڈ اپنے نام کیے ہیں۔
عرفان محسود نے مارشل پش اپس، اسکواٹس، جمپنگ جیکس، سٹیپ اپس، نی سٹرائکس، ایلبو سٹرائکس، سائڈ جمپس، ہائی جمپس اور اسٹار جمپس سمیت کئی اقسام میں بھی ریکارڈز قائم کیے ہیں۔
اب تک عرفان محسود 20 مختلف ممالک کے عالمی ریکارڈ توڑ چکے ہیں، جن میں امریکہ، برطانیہ، بھارت، چین، ناروے، جرمنی، فرانس، فن لینڈ، فلپائن، اسپین، اٹلی، لبنان، مصر، عراق، شام اور پاکستان شامل ہیں۔
عرفان محسود کے 20 شاگرد بھی گینیز ورلڈ ریکارڈز اپنے نام کر چکے ہیں۔ انہیں اپنی شاندار کارکردگی کے اعتراف میں 2023 میں صدارتی ایوارڈ برائے حسن کارکردگی سے نوازا جا چکا ہے۔
