ضلع جنوبی وزیرستان اپر اور لوئر کے مختلف علاقوں میں کل 28 اگست کو صبح 6 بجے سے شام 7 بجے تک مکمل کرفیو نافذ رہے گا۔
دونوں اضلاع کی انتظامیہ کی جانب سے جاری کئے گئے نوٹیفکیشن کے مطابق کرفیو کے دوران تمام قسم کی نقل و حرکت پر پابندی ہوگی جبکہ بازار اور مارکیٹس بند رہیں گی۔ عوام سے پر زور اپیل کی گئی ہے کہ وہ امن و امان کی صورتحال کو برقرار رکھنے کے لیے ضلعی انتظامیہ کے ساتھ بھرپور تعاون کریں۔
کرفیو کے دوران جنوبی وزیرستان لوئر کی تحصیل برمل اور شکئی میں داخلے پر سخت پابندی عائد ہوگی۔ متاثرہ راستوں میں وانا، تیارزہ گیٹ، کرب کوٹ، تنائی، عزیز آباد چوک سے درگئی پل تک، اور شکئی سے انزر چینہ تک وانا شامل ہیں۔
اسی طرح ضلع جنوبی وزیرستان اپر کے راستوں پر بھی داخلہ ممنوع ہوگا جن میں سپینکئی رغزئی تا نظر خیل، آسمان منزہ تا کانیگرم، شیرونگی، سپین جماعت تا توروام، درگئی پل، مدی جان، شین ورسک، مولا خان سرائے تا چگملائی، اور سرویکئ شامل ہیں۔
نوٹیفکیشن میں یہ بھی واضح کیا گیا ہے کہ ایمرجنسی کی صورت میں متعلقہ راستوں پر پولیس یا سیکیورٹی فورسز کی اجازت اور شناختی دستاویزات جمع کروانے کے بعد ہی سفر کی اجازت دی جائے گی۔
مزید برآں، سیکیورٹی فورسز کی گاڑی دیکھتے ہی تمام شہری اپنی گاڑی کو سڑک سے کم از کم 100 میٹر نیچے اتارنے کے پابند ہوں گے۔
ضلعی انتظامیہ نے ڈیرہ اسماعیل خان اور ٹانک سے جنوبی وزیرستان اپر کا سفر کرنے والے مسافروں سے اپیل کی ہے کہ وہ اس دوران غیر ضروری سفر سے گریز کریں۔
