بےنظیر انکم سپورٹ پروگرام میں ایک ہی بچے کے لیے دو ماؤں کو ادائیگی کے 2 ہزار سے زائد کیسز سامنے آگئے۔
پبلک اکاؤنٹس کمیٹی (پی اے سی) کا اجلاس جنید اکبر خان کی زیر صدارت ہوا جس میں ایک بچے کے لیے 2 ماؤں کو ادائیگیوں کے آڈٹ اعتراض کا جائزہ لیا گیا۔
آڈٹ بریفنگ میں بتایا گیا کہ ایک ہی بچے کے لیے 2 ماؤں کو ادائیگی کے 2 ہزار 312 کیسز رپورٹ ہوئے اور اس مد میں ایک کروڑ 40 لاکھ روپے کی ادائیگی کی گئی۔
آڈیٹر جنرل پاکستان کے مطابق یہ رقوم بچوں کو تعلیمی وظائف کے تحت نقد کی صورت میں دی گئیں۔
بریفنگ میں بتایا گیا کہ ایک ہی بچے کے بے فارم کے ساتھ مختلف ماؤں کو منسلک کیا گیا اور آڈٹ کی نظر میں فنڈز کی ادائیگی مشکوک اور بے ضابطہ تھی۔
کمیٹی نے دوبارہ ڈی اے سی میں معاملہ نمٹانے کی ہدایت کر دی۔
