ڈسٹرکٹ اینڈ سیشن کورٹ اسلام آباد نے وزیراعلیٰ خیبر پختونخوا محمد سہیل آفریدی کے خلاف ریاستی اداروں پر مبینہ الزامات عائد کرنے اور اداروں کی ساکھ کو نقصان پہنچانے سے متعلق کیس میں ان کی عدم حاضری پر ناقابلِ ضمانت وارنٹ گرفتاری جاری کر دیے ہیں۔
مقدمے کی سماعت ڈسٹرکٹ اینڈ سیشن کورٹس اسلام آباد میں سینئر سول جج عباس شاہ نے کی۔
سماعت کے دوران سہیل آفریدی عدالت میں پیش نہ ہوئے جس پر عدالت نے قانون کے مطابق کارروائی کرتے ہوئے متعلقہ اداروں کو سہیل آفریدی کو گرفتار کر کے پیش کرنے کا حکم جاری کیا۔
عدالت نے کیس کی آئندہ سماعت 10 فروری مقرر کرتے ہوئے کارروائی ملتوی کر دی۔
یاد رہے کہ سہیل آفریدی کے خلاف پیکا ایکٹ کے تحت نیشنل سائبر کرائم انویسٹی گیشن ایجنسی (این سی سی آئی اے) کی جانب سے مقدمہ درج کیا گیا ہے، جس میں ریاستی اداروں پر مبینہ گمراہ کن الزامات کا معاملہ شامل ہے۔
