افغانستان میں دو روز کی معطلی کے بعد انٹرنیٹ اور دیگر ٹیلی کمیونیکیشن سروسز دوبارہ فعال کردی گئی ہیں۔
ملک کے تمام بڑے نیٹ ورکس نے اپنی سروسز بحال کردی ہیں جن میں انٹرنیٹ اور رابطے کی دیگر سہولیات شامل ہیں۔
مقامی ذرائع کے مطابق گزشتہ 48 گھنٹوں کے دوران ملک بھر میں انٹرنیٹ اور کمیونیکیشن کا نظام معطل رہا، جس کے باعث لوگوں کو مشکلات کا سامنا کرنا پڑا۔
افغان حکومت کے ترجمان ذبیح اللہ مجاہد نے اس بات کی تردید کی ہے کہ انٹرنیٹ پر کسی قسم کی سرکاری پابندی عائد کی گئی تھی۔ ان کے مطابق تکنیکی ماہرین اس وقت فائبر آپٹک نیٹ ورک کی مرمت میں مصروف ہیں۔
ذبیح اللہ مجاہد کا کہنا ہے کہ ملک میں موجود فائبر آپٹک کیبلز کافی پرانی اور خستہ ہو چکی تھیں جنہیں اب بحال کیا جا رہا ہے۔
یاد رہے کہ انٹرنیٹ کی اس بندش کے باعث افغانستان کے اندر اور بیرون دنیا سے رابطے شدید متاثر ہوئے۔ نہ صرف عام صارفین کو مشکلات کا سامنا رہا بلکہ بینکنگ سسٹمز، آن لائن تعلیم اور دیگر اہم ڈیجیٹل خدمات بھی معطل ہو گئیں۔
