پشاور ہائیکورٹ کے چیف جسٹس ایس ایم عتیق شاہ نے جنوبی وزیرستان میں غیر فعال بنیادی صحت مراکز (بی ایچ یوز) کے حوالے سے عدالتی احکامات پر عمل درآمد نہ ہونے پر سخت برہمی کا اظہار کیا ہے۔
پشاور ہائیکورٹ میں دائر درخواست کی سماعت کے دوران چیف سیکریٹری خیبر پختونخوا شہاب علی شاہ اور ایڈووکیٹ جنرل عدالت میں پیش ہوئے۔
چیف جسٹس نے کہا کہ یہ انتہائی افسوسناک ہے کہ عدالتی احکامات کے باوجود متعلقہ ادارے عمل درآمد نہیں کرا پا رہے۔ صوبے کے عوام پہلے ہی بنیادی سہولیات سے محروم ہیں یہاں کے لوگوں کے لیے آسانیاں پیدا کریں مشکلات نہیں۔
چیف جسٹس نے حکام کو تنبیہ کرتے ہوئے کہا کہ عدالت کی ہدایات کو سنجیدگی سے لیا جائے ورنہ سخت قانونی کارروائی کی جائے گی۔
سماعت کے دوران چیف سیکریٹری شہاب علی شاہ نے عدالت کو یقین دلایا کہ وہ ذاتی طور پر عدالتی احکامات پر عمل درآمد یقینی بنائیں گے اور اس حوالے سے ہفتہ وار رپورٹ عدالت میں جمع کروائی جائے گی۔
عدالت نے چیف سیکریٹری کی یقین دہانی کو ریکارڈ کا حصہ بناتے ہوئے کیس کی سماعت آئندہ تاریخ تک ملتوی کر دی۔
