جنوبی وزیرستان لوئر کے صدر مقام وانا کے رستم بازار میں امن کمیٹی کے دفتر کے قریب دھماکے میں7 افراد جاں بحق جبکہ 9 افراد زخمی ہوگئے ہیں۔
مقامی میڈیا رپورٹس کے مطابق امن کمیٹی کے رکن سیف الرحمن کے دفتر کو بم سے نشانہ بنایا گیا ہے.
پولیس کا کہنا ہے کہ دھماکے کی شدت اتنی زیادہ تھی کہ امن کمیٹی کے دفتر کی عمارت مکمل طور پر تباہ ہو گئی اور کئی افراد ملبے تلے دب گئے۔
اطلاع ملتے ہی ریسکیو ٹیمیں اور مقامی لوگ فوری طور پر جائے وقوعہ پر پہنچے اور زخمیوں کو ملبے سے نکالنے کے لیے امدادی کارروائیاں شروع کر دیں۔
ہسپتال انتظامیہ کے مطابق مجموعی طور پر 16 افراد کو زخمی حالت میں ہسپتال منتقل کیا گیا تھا، جن میں سے7 جانبر نہ ہو سکے۔
تاحال دھماکے کی نوعیت اور اس کے محرکات کے بارے میں کوئی سرکاری بیان جاری نہیں کیا گیا۔ تاہم پولیس اور سیکیورٹی اداروں نے علاقے کو گھیرے میں لے کر تحقیقات کا آغاز کر دیا ہے۔
